網購糕點無王管 港府把關成虛擬

講起步步高陞，寓意吉祥嘅賀年糕點例牌唔少得，不過大家食還食，切勿掉以輕心吖，近年網購成風，網上拍賣平台乍現大量所謂「自家製」嘅應節糕點，良莠不齊，泥沙俱下，市民萬一不慎中招，食咗唔係步步高陞，而係步步驚心吖。

嗱，就講成分標籤甩甩漏漏，已經係網購糕點無王管嘅證據喇。現行法例訂明，凡未領有食物製造廠牌照以及預先包裝嘅食物，都要標籤列明名稱、配料、保質期及儲存等資料，否則均屬違法，但係網購糕點，好多包裝盒上並無成分標籤，咁仲唔係監管甩漏？咪以為小小一張成分標籤無關大礙，家陣對食物過敏嘅市民愈來愈多，一旦有人唔好彩中招，輕則嘔吐腹瀉，重則呼吸困難甚至致命，唔講得笑。

對於食物把關粗疏，官老爺點講呢？食環署話喎，一直有監察網上銷售食物情況，去年曾就網上無牌出售食物及金屬雜質鎘含量高於法定上限共作出十宗檢控咁話。乜話，一年得十宗檢控個案咁大把？正如有立法會議員話齋，分明就係懶於執法喇。再講吖，十宗檢控都係關於無牌銷售同致癌物超標，無成分標籤食品一宗檢控都冇，當局執法咁鬆手，難怪違規糕點氾濫成災喇。

所以功夫茶經常懷疑，食環署一直存在喺虛擬世界入面，所謂食品監管，根本係唔存在嘅。係人都知，網購已經成為城市生活一部分，透過網購品嘗民間美食更加成為好多港人嘅習慣，但有一利必有一弊，不法分子往往利用網絡平台搞詐騙，港府居然對網購食品安全闊佬懶理，敷衍塞責，咁同攞市民生命健康較飛有乜分別。呢，本報曾經踢爆，網絡蛋糕店如雨後春筍，當中唔少打住「蛋糕教室」嘅招牌，掛羊頭賣狗肉，衞生安全毫無保障，卻可以大模廝樣做生意。點解呀？咪因為當局疏於監管囉，又冇立法規管，又冇加強巡查，更加冇定期抽檢，唔遍地開花至奇咯。

咁講喇，網絡世界日新月異，港府亦要與時並進，規管網購食品刻不容緩。如果港產官僚食得有問題糕點太多，腦筋呆滯唔識點做，不妨參考外國經驗吖。好似德國咁，早已成立機構專責抽驗網上食品；又好似內地咁，正在修例規定經營者必須取得食品生產經營許可。香港監管工作連內地都不如，究竟有幾兒戲，大家心照。

一句講晒，網購糕點無王管，食物安全淪空談。港產官僚唔該速速亡羊補牢，萬一搞到市民禍從口入，你哋莫講話唔使旨意步步高陞，隨時畀人掟發霉糕點，變成豬頭都似。