香港實行「一國兩制」，如果你以為係指內地搞社會主義制度，香港搞資本主義制度，咁就大錯特錯嘞，查實內地家陣行緊「官不聊生」制度，而香港就係「官官相護」制度，貪官逍遙法外唔在講，出咗重大人命事故亦奉旨唔使孭鑊。所以話，喺香港做官，一個字，「爽」！
呢，導致三十九人喪生嘅南丫海難，高院尋日對兩名肇事船長判刑，佢哋因誤殺罪以及危害他人海上安全罪，分別被判入獄八年同九個月。講真，發生呢場慘絕人寰嘅大悲劇，兩位船長疏忽大意絕對難辭其咎，被判刑完全係罪有應得。不過咁喎，同人唔同命，船長就話要付出代價，但係監管不力嘅海事處官員就萬事大吉，點對得住海難冤魂先？有家屬就講得啱嘞，涉事嘅海事處高官已經順利退休，印印腳咬長糧，亦即係話，納稅人仲要夾錢供養「殺人兇手」，試問天理何在吖。
即係咁，對於相關官員嘅責任，港府拖得就拖，先係花幾個月整咗個獨立專家調查報告，之後又用接近一年進行海事處內部紀律調查。好嘞，調查完晒啦，以為有人會落鑊啦，點知當局居然借司法程序過橋，拒絕披露足本調查報告，甚至連邊啲官員要負責都玩隱瞞，呢啲唔係官官相護又係乜呀？
當然啦，唔理你點瞞點拖，紙始終係包唔住火嘅。雖然未開名，但係獨立調查報告直斥海事處無論喺肇事船隻設計、監管抑或驗收，都犯下連串錯誤，係造成重大傷亡嘅原因。部門阿頭擺明失職，正常計梗係要問責，可惜香港官場文化就係咁唔「正常」，前處長廖漢波連一句道歉都唔想講，家陣一樣可以安全軟着陸，吹得佢脹咩！
即係咁，官員權力愈大，責任愈大，呢個係政治倫理嘅ABC，更加係國際通例，每逢有嚴重人命事故，直接相關嘅技術官僚固然走唔甩，相關主管官員亦要承擔政治責任。好似南韓咁吖，「世越號」海難後，總理劈炮；又例如台灣，當年八八風災，內閣總辭，舊年高雄氣爆，副市長走人；即使係貪腐橫行嘅內地都唔例外，尋日之嘛，當局宣布前全國政協副主席蘇榮嘅罪狀，其中一條就係主政江西時對當地腐敗問題「負有主要領導責任」。你哋話嘞，搵勻全世界，係得香港高官咁着數，無論犯幾多錯都可以好官我自為之，長糧我自咬之，呢啲咁筍嘅工去邊度搵吖。
點講都好喇，家陣司法程序已經走完嘞，港府再冇藉口繼續遮遮掩掩，包庇護短，責任誰屬，點樣懲處，係時候算總帳嘞，否則嘅話，莫講話家屬唔放過你哋，死難冤魂都唔會放過你哋呀！