可持續發展委員會負責推動可持續發展優先範疇、融合環境、社會同經濟嘅策略等工作。政府尋日宣布委員會大換班，連同主席在內有十三名新人加入。多名「梁粉」包括行政會議成員李國章、北區區議員劉國勳、觀塘區議員鄧咏駿等加入委員會，其中李國章接替即將任滿六年主席嘅另一行政會議成員陳智思，出任委員會新任主席。
新一屆可持續發展委員會成員人數增至二十五人，有關任期於三月一日生效，為期兩年。其中新獲委任嘅委員多人都係「梁粉」，另有觀塘區議會主席陳振彬、信和置業執行董事黃永光、香港軟件行業協會會長楊全盛、基督教家庭服務中心總幹事郭烈東等。
有新人加入自然有舊人離開，一一年三月開始出任委員嘅中文大學校長沈祖堯將於本月底離任，而港鐵公司前事務總經理梁陳智明，任滿六年後亦會退下火線。