政情：象哥：「行政長官」要我飲涼藥
流感大爆發，好多議員尋日都好着急問食物及衞生局局長高永文點搞，頭髮都白晒嘅進出口界議員黃定光（象哥）提問時，竟然講番自己細個時都經歷流感高峰期，「個個流住兩行鼻涕，好似鼻涕蟲咁」，於是阿媽就會一人畀一個香囊佢哋袋住，又會將用過嘅手巾仔浸滴露，仲話嗰時有好多民間智慧，點解依家唔見晒喎。
中醫抗疫？ 高永文無意見
象哥又大講冷笑話話屋企個「行政長官」（太太）耐唔耐就要佢飲涼藥，飲咗就藥到病除咁話，問高永文中醫o係流感高峰期係咪可以發揮作用。高永文聽到都唔知好嬲定好笑，笑住答佢：「你屋企個行政長官可能好清楚你體質，我無意見！」對於香囊呢D偏方，佢作為醫生就相信實證醫學，中醫無疑對社區有好大貢獻，但無論用咩方法都最好先徵詢專業意見。