政情：生日凶轉吉 樹根喜羊羊

鄧家彪大凶

楊師傅話，今年普遍議員運程都頗差，尤其農曆九月情況更見明顯，不單小人是非及人事爭拗多，部分更要額外留神健康及感情狀況。好似生日後將轉入忌神運嘅新民黨葉劉淑儀，羊年凡事多阻滯，有「過剛則折」嘅局面，春夏比較平凡，但秋冬不吉，要注意健康，特別係肺部氣管之患，而農曆十月小人是非更係特別多！

同樣春夏平凡、秋冬不利嘅仲有劉慧卿，佢大運沖日腳，忌神出現，流年多是非之餘，農曆六月最差。工聯會麥美娟更適逢傷官之年，有機會受小人是非、人事不和等問題困擾，春夏不順，要到冬季才轉好。同屬工聯會嘅鄧家彪亦要小心，農曆十二月會有大凶之象，但已在區議會選舉之後，唔知會發生咩事呢？

「元秋」續強悍

觀乎芸芸議員之中，樹根嘅運勢似乎較佳。楊師傅話，由於樹根三月生日後轉入丁酉大運，雖然流年不利，但有大運之助，可轉凶為吉，故依然風騷，只有農曆六、九月略差。至於有「元秋」之稱、有副「戰鬥格」嘅蔣麗芸，羊年繼續有強悍本色，春夏不順多阻滯，但秋天大旺。

此外，今年部分議員要留意感情及健康問題，楊師傅話，陳恒鑌流年吉凶參半，一得一失，春季因財失義，有感情麻煩。

會計界梁繼昌亦流年不順，易破財及有感情煩惱；就連剛新婚嘅郭偉強都走唔甩，由於今年大運轉入忌神運，剋洩交加，有感情煩惱，可能婚後要花多啲心思與太太磨合喇。至於王國興同林大輝春季健康相對差，後者要注意腸胃疾病。