中環出更：改圖諷民記 發展局遭投訴
現今網絡當道，政府新聞處（I S D）去年底都開始喺社交網站開設專頁「政府新聞網」，不時點評、甚至調侃時政。好似保安局前局長葉劉淑儀早前被黑客騙徒入侵電郵，騙取約五十萬元，I S D專頁就上載宣傳片，提醒市民「黑客匿埋暗角，密碼唔改唔得」，仲用假電郵標題「I need help. Urgent.」「抽水」，葉太有冇嬲就唔知道喇。
政府新聞處專頁迎合網民
I S D去年十月更新專頁，搵咗幾名新聞主任（I O）及非公務員合約嘅年輕員工，負責睇住新聞點子、製圖等工作。I S D都深知，要令網民鍾意睇，就要用最簡單嘅資訊，配以吸引嘅圖片。由於網民鍾意睇諷刺話題，所以I S D都似乎一改作風玩諷刺，但究竟被諷刺對象會一笑置之，定係真心嬲咗，真係言人人殊。
早前發展局專頁就曾經改圖玩民建聯（民記）區議員祝賀聖誕橫額串錯「Merry Chrismax」及「Marry Christmas」，點知民記中人動咗真火，仲走去搵政府中人投訴。其實民記自己出錯被玩，點解仲要怪人呢？好似立法會議員陳克勤嘅橫額都寫錯自己個名做「陳克群」，事後佢仲識得自嘲，呢啲咪襟撈囉！
卓妮