中環出更：安老院動土博愛宴長者
博愛醫院年前獲地產商捐出屯門藍地十萬平方呎地皮，興建長者護養及護理中心，尋日終於擇好良辰吉日舉行動土禮。博愛醫院喺眾慈善團體中獲贈靚地建院，董事局候任主席譚姜美珠自然喜上眉梢，仲話院方正計劃喺地皮附近另覓地方，興建護理人員培訓學校及小型醫院，為呢間全港以至東亞南規模最大嘅安老院提供一站式安老服務。
博愛醫院除咗舉行動土禮，仲大擺五十圍宴請長者食盆菜。譚太進一步透露安老院大計話，屆時院舍除咗將天台設計成綠化園藝空間，地下亦會鋪植草皮畀長者打草地滾球；而長者入住院舍絕對唔侷促，床位收費亦暫定同博愛轄下私家院舍差唔多，相信一定成為搶手貨，難怪譚太笑言自己都想擔櫈仔霸定位喇！
同場仲有博愛醫院副主席兼衍生集團主席彭少衍，佢話已經執拾細軟，準備明日陪太太飛赴澳洲過年，行程主打當地多個國家公園，但佢話行程由太太話事兼任導遊，佢負責找數就得喇。
小肥張年初二避「播菌」
不過，博愛醫院另一副主席陳李妮（Lily）日前返鄉下海南出席會議時就發生小插曲，佢回港前漏低咗對高踭鞋喺當地酒店，直至尋日先發現唔見咗，好彩酒店職員已經幫佢收起對鞋，Lily先鬆一口氣。佢笑言對鞋跟足佢五年，失而復得感覺更開心。
博愛醫院興建安老院，幫政府縮短安老院舍輪候時間，勞工及福利局局長張建宗（小肥張）當然現身支持，仲滿場飛冧長者。不過，小肥張今年將唔按傳統趁年初二探訪安老院。原來佢擔心近日時值流感高峰期，勞師動眾探訪長者可能容易散播病菌，寧願另擇吉日再探公公婆婆好過喇。
卓妮