國之將亡，必有妖孽，真係一啲冇講錯。睇吓家陣嘅香港就知嘞，街頭佔領話就話落幕咋，但立法會繼續被牛鬼蛇神佔領，連天橋、隧道都被流浪者佔領，簡直烏煙瘴氣，七國咁亂。正如「東方報業民意調查」顯示，絕大部分受訪者直斥當局執法不力，部門卸責，香港唔變成露宿港、流浪港都幾難。
冇誇張o架，本報記者巡查港九多處地方，發現到處都有流浪者蹤影，深水埗及油尖旺等舊區更加係重災區。好似深水埗昌新里行人天橋咁吖，有成二十幾個露宿者畫地為界，用木板搭建私人王國，不知幾爽。旺角染布房街一帶嘅行人天橋亦不遑多讓，被十多名露宿者霸住，藏污納垢，臭氣沖天。
咪以為港島區多有錢人居住就冇呢啲問題，跑馬地馬場對出嘅行人隧道一樣被南亞裔露宿者攻陷，佢哋仲設置石油氣爐煮食，甚至疑似駁線偷電，問你服未。至於北角早前更發生露宿者以生果刀挾持人質事件，差啲搞出大鑊嘢。「東方報業民意調查」顯示，對於露宿者霸佔過路設施，四成四受訪者直指本港住屋及安置存在問題；兩成八批評阻礙行人；一成六擔心香港變成露宿港。
即係咁，有瓦遮頭嘅都唔想流浪喇，大部分露宿者流落街頭都有不得已嘅苦衷，但點都好，露宿問題失控，真係好擾民o架。特別係南亞裔露宿大軍，佢哋恃住有酷刑聲請呢個擋箭牌，大舉襲港，從事犯罪活動，唔少盜竊、高空擲物及吸毒案都係佢哋搞出嚟，問你點頂。
搞成咁，政府部門梗係責無旁貸喇。正如區議員話齋，運輸署規劃失當，喺行人天橋或隧道附近另設過路設施，搞到原有設施被荒廢，淪為「廢橋」、「廢隧道」，被流浪者進駐。更激氣嘅係，食環署、運輸署、社署及警方你推我讓，闊佬懶理。四成七受訪者直斥部門各自為政，互相卸責；兩成八批評巡查及執法不力；一成七直指變本加厲，烏煙瘴氣。
講到佔領公眾地方，外傭亦唔執輸。本報揭發旺角及馬鞍山行人天橋，每逢假日都被外傭闢作熟食市場，阻礙交通有之，開爐煮食有之，萬一引致火警，後果不堪設想。你話嘞，香港由堂堂國際大都會淪為流浪者之家同埋外傭樂園，成何體統吖？唔怪得逾七成受訪者指摘當局執法不力，對問題視若無睹，變相縱容。
冇計喇，港府無能，官僚卸膊，露宿問題咁小事都搞唔掂，唔怪得被反對派玩殘嘞。話時話，港產官僚出名唔見棺材唔流眼淚，流浪者同外傭不妨佔領高官大宅，睇吓當局仲會唔會咁懶懶閒吖嗱！