有道是「力貴齊，知貴捷」，意思係用力貴在突發迅猛，智慧貴在敏捷；兩者強調的，無非都是以迅速為上，要取勝嘅道理，其實亦一樣，遲緩為下。可恨的是，特區政府樣樣歎慢板，「絕代雙貪」查到日月無光，好似貪曾咁查咗三年，依然屁也沒響一個！好嘞！家陣政府煞有介事檢討千瘡百孔嘅《淫褻及不雅物品管制條例》，前前後後諮詢咗六年，才鬼祟公布最終的修例建議。
表面睇落係有「變」，如將多項罪行的最高罰款提高一倍及增加審裁員總人數等。之不過，稍為分析一下，就知道又係「吹吹水，唔抹嘴」、「有姿勢，冇實際」。嗱！好似罰款提高一倍又有乜用啫？正如曾擔任淫審處審裁委員十八年嘅張民炳話齋，現時評級制存漏洞，判刑甚少去到數十萬元，令立心不良嘅傳媒覺得「博得過」。
冇錯，正如壹淫媒已有一百二十多次觸犯淫褻條例嘅紀錄，當局每次都係罰一萬幾千，又從來冇人坐過一日監；講真，如果依法例，壹淫媒應已被罰到破產！所謂「矩不正，不可以為方；規不正，不可以為圓」，淫審處根本就係唔依規矩做嘢，一味玩親疏有別，是以明眼人對其改革，無不嗤之以鼻，認為「嘥氣」、「虛應故事」。
淫審處最令人詬病的係評級無準則，同一輯Kelly Brook性感照，搞出三重標準，罰《東方》、《太陽》而放生爛果報，而外國雜誌無打格無包膠袋亦無送檢；如此選擇性執法，老朽睇到淫審處只係一個裝點法律嘅門面，完全違背了公平和理性嘅原則。淫審處嘅存在，竟然係製造不公不義，簡直係香港法律嘅恥辱！係一個法治社會嘅悲哀！
講真，淫審處改革，除了嘥氣，再多的「換湯不換藥」，亦不過是空洞嘅口號！不如廢之，社會還有幾分安寧、少鬧些笑話，更慳番唔少公帑養一班廢柴！