政情：龐愛蘭戰「區」 隨時墜「基」
二○一二年「嫁」入地區政團公民力量（公記）參選立法會嘅沙田區議員龐愛蘭（Scarlett），去年並未有跟隨公記加入新民黨，今年底區議會選舉就要繼續以半獨立身份出戰。原本建制派一向有協調參選機制，確保唔會自相殘殺，可惜Scarlett無入新民黨，結果惹來經民聯派人「搶位」。呢位對手就係有律師背景嘅申偉基（Ricky），尋日仲喺黨嘅旺角花墟年宵攤位亮相添，睇嚟Scarlett要醒定啲嘞。
Ricky○六年喺澳洲畢業返港工作，依家做律師之餘仲兼任經民聯社區發展幹事，主要幫街坊做吓法律諮詢。喺社交網站上發現，家住火炭嘅Ricky積極落區，唔知係咪有意參選區議會呢？Ricky話依家主要做地區服務，區選之事就遲吓先講。
另傳公文袋亦派人搶位
如果Ricky真係打算落戶火炭，相信會係越級挑戰，皆因已連任兩屆區議員嘅Scarlett都有相當嘅知名度，想搶位都唔係咁容易。不過，有傳公民黨大律師楊岳橋有意出選火炭區，佢都係打正專業人士旗號參選，如果Scarlett被Ricky分咁啲票，都唔係無危機，相信將會有一番龍爭虎鬥。