政情：葉振南領遊粵 「噴」出驚喜
汕頭商會會長葉振南（Stephen）上任無耐，日前就打響頭炮帶隊遊粵東四市，包括汕頭、汕尾、潮州及揭陽市，隨團成員有成五十多人，唔少團友首次回鄉，感覺如入大觀園。行程主打考察加美食，副會長吳漢忠、常務會董張詩培（Joanne）都加入「為食兵團」，每日盡情食好嘢，十足拍旅遊節目咁款。
Stephen帶隊食巨型獅頭鵝、手打魚蛋及韮菜茶粿等，款式花多眼亂。不過，醫肚都係其次，團友最想睇揭陽市內的音樂噴泉表演，繽紛激光與一百米高嘅水柱共舞，非常壯觀。可惜到達現場一刻，一滴水花都唔見，細問之下，噴泉表演每星期只演一場，正當團友以為緣慳一面，突然傳來噴發式水聲。噴泉「忽然加班」，Stephen笑笑口話係有心人安排，畀個驚喜大家喎。