行政會議非官守成員羅范椒芬早幾日先上電台同立法會議員陳偉業（大舊）隔空駁火，大舊即場踢爆羅范曾經以短訊鬧佢「拉布」影響人會「天誅地滅」。點知事隔幾日，羅范再上同一間電台語出驚人，話大舊當日不禮貌回覆短訊，先會用「天誅地滅」來回敬。羅范仲爆出一句，話大舊呢種態度猶如「伊斯蘭國（IS）無喇喇捉人斬頭」。佢哋咁樣再講落去，會唔會愈講愈離譜呢？
羅范尋日再上電台再為創新及科技局開局講好說話，佢話對立法會未能表決有關撥款感到痛心同失望。當佢重提上次同大舊嘅隔空駁火時，似乎仍然相當氣憤，佢話自己向來「人不犯我、我不犯人」，曾經約見部分「拉布」嘅泛民主派議員，點知全部請佢食檸檬，羅范惟有發短訊游說眾人，好似梁國雄（長毛）都好禮貌回覆，只得大舊不禮貌回應。
羅范形容大舊呢種回應手法好似「伊斯蘭國」咁，無喇喇捉咗人哋去斬頭，仲話自己喺政府已經示弱咗好耐，所以一定要還擊。大舊聽到羅范話佢似「伊斯蘭國」，就話羅范反應過敏，有妄想症，缺乏常識，但唔諗住再約見羅范，以免對方愈解釋愈錯喎。