政情：高官運蹇誰最黑？Greg蘇 吳得掂
正所謂一年之計在於春，本月四日「立春」已正式踏入羊年，我哋一如往年邀請香港術數家協會術數師楊子東幫一眾政府高官批算八字流年運程。今年乙未年，楊師傅點評多位高官運勢都普遍較差，部分「財強身弱」，全年以農曆九月情況最惡劣，其中商務及經濟發展局局長蘇錦樑（Greg蘇）更加係最運滯，「全年唔合格」、春夏冇建樹之餘，仲講多錯多。
教育局長控制唔到自己
除咗Greg蘇外，近期推銷政改頻頻捱打嘅政務司司長林鄭月娥亦唔好得去邊。楊師傅話，林鄭於五月中生日後即將轉入辛亥大運，以農曆六、十、十一月最不利，人事鬥爭激烈，勞心勞力不得寸進，連貴人或上司都愛莫能助，形成孤掌難鳴之局。同為政改三人組之一嘅政制及內地事務局局長譚志源，人事爭執同樣不絕，以農曆五月最差，七、八月才轉順，但到九月又逆轉。
至於教育局局長吳克儉今年「官殺大旺」，是非官非沾上邊，反反覆覆，農曆七月仲分分鐘失控添！即係點？即係自己都控制唔到自己，唔知想點，又或講錯嘢掀起風波。即將發表財政預算案嘅財政司司長曾俊華，流年與大運相刑，楊師傅話曾今年春天尚算順利，但農曆六月及九月「有志難伸」，十二月仲做埋夾心人，吃力不討好，而農曆九月要多加注意健康。
馮煒光可能有女人之患
眾官之中，發展局局長陳茂波就官運亨通，但佢又係九月份要注意健康，夫妻運不順，太太或會有負面事情發生，其他月份則平凡是福。運輸及房屋局局長張炳良則上半年較旺，農曆七、八月轉差，冬季不利。楊師傅仲提到，早前先自爆有拖拍嘅特首辦新聞統籌專員馮煒光流年不利，可能有女人之患！
講到香港羊年整體運程，楊師傅話羊年唔及去年好，地產冬季或大跌最多兩成，失業率回升，農曆九月出門要特別小心，除了疫情肆虐外，仲可能有地震。不過，信則有不信則無，唔使太上心嘅，可以參考吓趨吉避凶。