中環出更：科水救亞視 不如施善舉
陷於財困嘅亞洲電視仍然出糧無望，想盡辦法撲水「籌旗」，除咗有人出奇招發起「一人一萬元救亞視」認股行動外，近日又變賣家當，又傳洽商「白武士」。卓妮前晚喺馬場同多位名人談起呢個城中熱話，但個個都唔多睇好亞視，又話集資呢招行唔通，有錢寧願捐畀慈善機構或搞好自己盤生意好過喎！
香港鐘表業總會前主席陳正欣（Daniel）話，按有關集資嘅規定，企業若超過五十位股東就要依循上市公司嘅規定。問題係亞視並非上市公司，無可能招收咁多位股東，就算想上市，連年虧蝕嘅業績根本無可能過到關。再者，亞視就算度過今次難關，若將來再遇到財政危機，唔通又再招攬另一批股東咩？
郭少明唔憂賽馬直播權易手
Daniel又話，自己身為馬迷，經常睇亞視嘅賽馬直播，若果亞視倒閉，佢會覺得好可惜。同樣熱愛賽馬嘅莎莎國際主席郭少明（Simon）就話，亞視若然有乜「冬瓜豆腐」，賽馬直播自然有其他電視台接手，所以如果亞視不幸執笠，佢都唔覺可惜喎。至於會唔會出手幫吓亞視，Simon耍手擰頭話，若有餘力寧可用嚟搞好自己盤生意喎！
中華廠商聯合會前會長施榮懷都對亞視無興趣，加上公司前景不明，實在好難吸引投資者。所以佢覺得，與其入股亞視不如捐錢去做慈善機構好過。卓妮仲見到公民教育委員會主席李宗德夫婦同好少現身嘅細女李美智，美智正喺澳洲讀大學，趁農曆年返港陪吓父母，認真孝順。
卓妮