政情：方剛叫領匯加租輕手啲
臨近農曆新年，好多市民都會按傳統習俗全屋大掃除，順便貼上揮春粉飾家居。尋日中午十二點鐘，批發及零售界立法會議員方剛就落去樂富商場及樂富市集派揮春。樂富市集經過一輪翻新大改造，比以往乾淨企理好多，地下亦唔再濕立立，但業主領匯好快就大幅加租。方剛就話，中小企好難生存，希望領匯若要加租，都要錫住啲商戶，唔好加咁多喎！
去樂富派揮春
方剛話，佢就住喺附近，不時會去樂富行吓，睇吓有冇好嘢可以買番屋企加餸。尋日佢睇完濕貨及乾貨區後，覺得規劃唔錯，人流亦夠多。不過佢都預咗領匯不久後就例牌會再加租，所以希望領匯克制啲，唔好趕絕小商戶。講到新年嘅願望，方剛話，羊係好溫和嘅動物，期望來年市民、政府及立法會議員都可以團結一致，和氣生財，經濟繁榮穩定咁話。