政情:羅康瑞論政 即場被噓爆

一向好少公開論政嘅機場管理局主席羅康瑞,尋日出席一個論壇時膽粗粗講政治,結果係台上演講嘉賓對其言論大潑冷水,台下觀眾就報以噓聲,認真冇面。

遭嘉賓潑冷水

科技大學邀請咗選舉制度專家John M Carey演講,並同多名嘉賓討論香港民主發展路向。做主持人嘅羅康瑞喺答問環節期間,失驚無神拎本《基本法》出嚟,話根據《基本法》第四十五條,特首係由一個有廣泛代表性嘅提名委員會提名後普選產生。不過,專家就質疑,提委會係咪有廣泛代表性,亦唔太認同功能組別嘅觀念,真係成盤冷水照頭淋落去羅康瑞度。

後來有人提到佔領行動,羅康瑞就接口話,佔領期間佢喺辦公室望落去,成日都見到物資源源不絕咁運送過嚟,又表示自己唔認同公民抗命,台下觀眾隨即報以噓聲抗議,搞到佢都有啲尷尬。既然講政治嘅反應麻麻,唔知下次佢會唔會考慮少講為妙呢?

第一手消息請下載on.cc東網iPhone/iPad/Android/Windows Phone Apps