政情：懲署視像面試 助釋囚搵工
新上任嘅懲教署署長邱子昭早前出席一個活動時，講起幫釋囚搵工，佢話好多在囚人士喺獲釋前就已經搵到工，皆因佢哋在囚期間已參與多種職業訓練，提高自身競爭力，然後喺刑滿前透過視像會議接受唔同公司嘅面試，咁樣就可以一重返社會，人生就有新嘅開始。
提早接受培訓
邱子昭話，好多善心社團及機構會提供招聘訊息，懲教署公示後，愛心僱主可於旺角透過懲教署嘅視像設施，同合適嘅在囚人士作視像面試，然後喺獲釋前三至二十四個月接受培訓機構安排嘅訓練。佢話，呢個安排令在囚人士獲聘機會大增，亦令在囚人士喺最徬徨嘅高危時期，及時搵到合適工作以便過正常生活，咁就可以避免因為無所事事而與昔日損友聚埋一齊。現時好多行業人手短缺，好似飲食業及建造業等，邊行缺人，佢哋就針對邊行做多啲培訓，真係一石二鳥。