政情：富貴黨欠新 兩老焗披甲？
下屆立法會選舉，如無意外會有唔少新面孔，因為無論係民主黨定民建聯，都希望進一步年輕化，推舉黨內第二梯隊出戰。但唔係個個黨都有咁多人才，據聞人丁單薄嘅自由黨（富貴黨）最近評估，一旦立法會議員林大輝最終謝絕入黨兼接收榮譽主席田北俊（田少）嘅新界東議席，田少或要焗住再戰一屆。至於港島區就可能由另一名榮譽主席劉健儀重出江湖。其實兩位老人家年紀唔細，仲要佢哋拋頭露面打選戰，究竟係富貴黨無人，定係老人們唔信得過班後生仔呢？
港島區有暗湧
明年立法會選舉嘅港島區戰況好難預測，因為盛傳立法會主席曾鈺成同新民黨葉劉淑儀都會退下火線，最多排名單第二位力谷新人上位。富貴黨內部評估認為，佔領行動過後該黨嘅形象同得分有增無減，成功吸納到一批中間派票源，所以就諗住博一博，推舉劉健儀復出再戰港島區。由於來屆選舉多位建制派大佬如譚耀宗都棄選，如果劉健儀成功當選，以佢咁多年嘅議會經驗，應該可以勝任立法會主席一職。
不過富貴黨可能算漏一點，就係來屆立法會選舉港島區議席由七變六，按推斷，泛民同建制好大可能平分秋色，各佔三席，咁新民黨、民建聯加工聯會已瓜分三個議席，富貴黨想攝位談何容易？再講，劉健儀上屆選舉只得萬幾票，短短幾年票數會否倍增，大家心中有數。
大輝去向未明
講開又講，聽聞由於大輝入黨一事遲遲未有定奪，富貴黨紡織及製衣界立法會議員鍾國斌有意轉戰直選，幫田少保住新界東議席。不過我哋問過富貴黨高層，佢就話絕無此事，仲話若最終大輝唔入黨，咁就會另覓人選，若搵唔到人就可能由田少再選多屆，鍾國斌會留番喺功能界別。雖然田少一早講明唔選，但據聞佢最近轉咗口風，又積極到沙田、大埔同將軍澳一帶落區。講真，兩年後田少都六十九歲，點解唔諗吓歎世界湊孫仔，要咁辛苦折騰自己呢？