中環出更：三勇士求愛 偲嫣勁派檸檬
正義聯盟召集人李偲嫣早前公開徵婚，開出條件話「愛我嘅男人要好勇敢」，估唔到事隔幾日就有多名「勇士」同佢示愛，情人節前夕搶閘以短訊同長途電話向偲嫣送上祝福，其中三人更直接表白求愛，而呢三人都係偲嫣相識嘅朋友。可惜偲嫣擔心相見好同住難，理念、性格唔一致，今鋪睇怕一眾勇士都係不戰而敗喇。
偲嫣話，勇士們想升呢做佢男友，要同佢一樣愛香港、撐警察，仲要唔怕事、有愛心，加上佢返工咁忙，想約佢出街都要遷就佢嘅時間。偲嫣要求咁高，難怪今年情人節依然未有着落，要晨早帶隊落沙田「捍衞」沙田商戶喇。
帶兵「捍衞」沙田
激進本土派吹雞今日大舉「光復沙田」，抗議水貨客擾民，但偲嫣好揀唔揀就趁人哋落區前一日，拉隊到新城市廣場派傳單，呼籲街坊同商戶拒絕暴力行為，成功避開正面交鋒。不過現場仍然引起一陣騷動，事關港鐵保安指佢哋行動未經申請，違反港鐵附例，但偲嫣一於少理，仲話本土派去到邊，佢哋港九新界都跟住去喎！
卓妮