古詩有云，隻手遮天曾幾時，萬人有口終能說。作奸犯科之徒遲早會被人踢爆，實走唔甩o架。前特首曾蔭權爵士任內同富豪勾勾搭搭，養肥地產霸權，搞到房屋問題不斷惡化，呢筆帳遲早要清算。
嗱，恒隆地產董事長陳啟宗日前再次發炮，指貪曾任內七年唔賣地，做法全世界罕見，樓價唔升至奇；最耐人尋味嘅係，當時有高官建議恢復賣地，貪曾居然一口拒絕，如果話冇蠱惑，細路仔都唔信喇。所以咯喎，當問及外界批評貪曾推高樓價旨在維護地產商利益，本身係地產商之一嘅陳啟宗深表認同，直言：「梗益我喇！但我唔會開心，因為咁做犧牲咗市民利益。」
貪曾被批評向地產商傾斜，佢可以厚顏否認，家陣連地產商都睇唔過眼，佢冇得抵賴嘞啩。其實，前朝政府房屋政策劣迹斑斑，唔止停止賣地，仲停建及停售居屋，當時令人莫名其妙，今日終於真相大白，原來貪曾嘅目的就係要谷高樓價益地產商。今日樓價高不可攀，尤其細價樓愈炒愈瘋狂，連租置計劃下嘅公屋都賣到一萬二千元一呎，就係拜佢所賜，唔怪得咁多富豪爭住請佢坐遊艇、住大屋喇。
話時話，貪曾視財團富豪為朋友，視蟻民福祉如浮雲，早已人盡皆知。大家應該記得，數年前佢仲未被人叫貪曾時，樓價已經好似火箭咁狂飆不止，完全脫離市民購買能力，當時有人投訴買唔起樓，要求貪曾高抬貴手遏抑樓價，點知貪曾涼薄到叫人搬去新界偏遠地區居住，仲話豪宅升勢唔會影響中小型單位，亦唔會影響民生喎，事後被輿論炮轟不食人間煙火。原來，當年大家誤會咗貪曾，佢唔係不食人間煙火，只係想食大茶飯，處心積慮大玩官商勾結啫。最慘係無殼蝸牛，喺官商勾結之下，私樓貴到買唔起，公屋少到輪唔到，新一期居屋更加爭崩頭，咁搞法，劏房點可能唔遍地開花吖！
講開又講，貪曾明益大財團，點止托高樓價咁簡單。呢，醜聞不絕嘅西九文化區就係佢一手催生，當年一意孤行將總值數百億元嘅巨型天幕項目以單一招標方式交予單一財團發展，擺明又係向地產霸權送大禮，如果唔係被炮轟隻手遮天，事件引起全城嘩然，計劃推倒重來，西九文化區可能已經變成商家肥豬肉咯。
所以話啫，貪曾唔止係高地價高樓價高租金嘅始作俑者，更加係官商勾結嘅罪魁禍首，咁嘅貪官如果逃過法律制裁，天理何在。廉署話已經完成對貪曾案嘅調查，據聞當局傾向不提出起訴喎。嗱，功夫茶可以斷言，如果傳聞屬實，港府準備陪貪曾受靶喇！