白鴿黨自佔領行動後，民望進一步低殘。自司徒華一去，白鴿黨內民心不穩，「老鴿」、「嫩鴿」湧現「棄黨潮」，風雨飄搖，加上負面新聞不斷，令人倍覺淒酸！
天下分久必合，白鴿黨二十周年黨慶，由盛而衰，亦可謂天理循環而已。大江東去，白鴿黨未能自強不息，反而胡搞不合作運動，如此盲動，氣數豈能不盡！
早前，白鴿黨放風話邀請咗好多政府高官出席，誰知到頭來又話ＣＹ杯葛，搞到原先答應出席嘅食物及衞生局局長高永文「忽然」縮沙！其實，道不同不相為謀，白鴿黨一早企硬反對通過政改方案，呢頭又叫ＣＹ下台，嗰頭又話要就政改辭職公投，玩嘢玩到過晒火位，就唔好怪人哋唔畀面喇。
其實，高官不出席，亦係向一代學者錢鍾書學嘢啫。錢鍾書生前堅拒新聞界採訪，也不出席甚麼紀念會或研討會，其名言係：「不必花些不明不白的錢，找些不三不四的人，說些不痛不癢的話。」白鴿黨既然與政府老早已火花四濺，一拍兩散，亦「事有必至，理有固然」，沒有甚麼值得大驚小怪！
之不過，一如明眼人所說，白鴿黨就官員唔出席其黨慶無限擴大，而政府又透過唔同渠道同白鴿黨鬥法，彼此幼稚鬥幼稚，連小學雞都不如。老朽雖然讀書少，都聽過《克雷洛夫寓言》有個故事：馬車上裝着兩隻木桶，一隻盛滿美酒，一隻空空如也。一路上，盛滿美酒的桶沉默不語，空空如也的桶則不停地大喊大叫，又唱又跳，吸引了不少路人嘅眼球。寓言的意思，一字咁淺：肚裏愈沒有貨色，叫喊得愈兇。
高官去不去白鴿黨黨慶，其實正如有論者說：筵無好筵，會無好會，不如休去！高官既沒有「自反而縮，雖千萬人，吾往矣」的人格，少說幾句話，不露底，看上去依然好有「修養」也。