政情：梁繼昌為政改轉軚鋪路？
立法會醫學界議員梁家騮日前喺業界「威脅」下做咗個業界政改民調，仲暫時承諾會就政改投反對票。查實會計界議員梁繼昌（Kenneth）之前都做過業界政改民調，仲豪言話會唔理業界意見，同其他泛民主派議員一齊否決政改方案。不過，事隔幾個月，Kenneth透露有意再做政改民調，仲話如果有七成選民支持「袋住先」，佢會考慮跟業界意見投票，莫非佢想轉軚撐政改？
再做業界民調
Kenneth話，聽聞政府想以業界民意迫佢接受「袋住先」，既然政府出到呢一招，佢就決定先發制人，喺政府推出具體方案後做多次政改民調，如果有超過七成選民支持「袋住先」，佢會考慮業界意見。但佢補充話，七成選民支持「袋住先」呢件事根本唔會發生，又話如果政府想準確收集業界意見，就應該舉行一次會計界大型公投。如果政府真係肯咁做，佢都只會參考民調結果，唔會轉軚支持方案喎。