政情：貪平幫襯馬航 單仲偕心慌
馬來西亞航空MH370客機去年三月喺吉隆坡附近海域離奇失蹤，馬來西亞兩星期前正式將客機失蹤定性為「意外」，推測機上所有乘客已經罹難。白鴿黨立法會議員單仲偕話，年初一將會去吉隆坡旅行，但佢就因為貪平買咗馬航機票，搞到依家都有啲心慌慌。單仲偕話驚都無辦法，但已經買重旅遊保險，萬一出事都有得賠喎。
MH370失蹤前訂票
單仲偕透露，佢喺一年前以五千五百多元買入兩張馬航機票，諗住去雪邦（Sepang）打高爾夫球。不過，由於當時未出現客機失蹤事件，加上佢出發當日係年初一，所以佢淨係覺得成件事好抵，完全唔覺得有咩問題。不過，馬航失蹤後佢就開始擔心會出事，但如果改買其他航空公司機票，初一出發最少要成一萬元，所以佢先決定唔理咁多繼續原定計劃。