中環出更：佔旺易服男 立會採訪惹驚恐
持續多時嘅佔領行動吸引唔少「別具一格」嘅人士參與，雖然行動結束已久，但呢啲人仍然長時間係添美道同立法會道流連，包括早前被《東網》踢爆男扮女裝嘅「佔旺易服男」「家俊哥」。「易服男」睇嚟唔甘於終日屈係添美道，尋日又有新搞作，就係以記者身份進入立法會大樓參與採訪活動。由於「家俊哥」長頭髮打扮似女性，有女記者就擔心佢會唔會入女廁，搞到人人自危。
「佔旺易服男」喺佔領行動期間一直以女裝打扮現身旺角佔領區，一時又話自己係陳小姐叫阿琪、一時又話自己任職港鐵車務主任，點知被踢爆其實姓練，係一個廿三歲、有詐騙案底嘅無業青年，部分人會叫佢做「家俊哥」。有關「家俊哥」嘅新聞真係一單接一單，佢曾經聲稱被軍裝警員強行拉出帳篷拖行兩米拳打腳踢，遭警棍打至頭破血流，最終證實係老屈警方。
稱任網媒記者
佔領行動結束後，「家俊哥」就由旺角轉去金鐘添美道流連，兩個月前又因為同添美道同伴有爭執，踢凹咗立法會大樓外鋼造嘅防煙門，被警方以涉嫌刑事毀壞罪拘捕。消失個多月後，佢尋日以記者身份現身立法會政府帳目委員會嘅記者會。見佢一頭長髮，身穿運動羽絨衣，在場用手機拍攝會內情況，但記者會開到一半，佢就走人。之後又見佢喺一樓走廊訪問議員謝偉俊，其後單獨一人時，不時撥弄長髮。
「家俊哥」話，佢依家為網上媒體擔任記者，因喺記者會被前面記者阻擋其鏡頭，所以咪中途走人囉。問番「家俊哥」性別，佢就話係私隱唔方便答啦，講完仲急急腳走人。據聞立會秘書處都知悉「家俊哥」嘅存在，但唔回應個別事件，所有傳媒代表只要符合指引，就可獲發臨時記者證。
卓妮