香港近年興起一股支持老店嘅風氣。有日下午我哋行經灣仔皇后大道東時，就見到裕華國貨董事長總經理余國春，步入一間於區內頗具名氣嘅舊式麵包店，買咗四個雞尾包，莫非佢專程去幫襯呢類老店？原來佢係咁啱經過啫。不過，余國春話呢間麵包店嘅牆磚同陳設係幾十年前嘅老款式，依家買少見少。佢話入去買幾個包，以行動支持呢類小店，又可一嘗傳統嘅港式麵包滋味喎！
