政情：「杏林覺醒」寸爆 史泰祖忍讓
一場佔領行動搞到社會四分五裂，連專業界別都唔例外。法律界早前就有退出律師會憲制及人權事務委員會委員嘅任建峰，聯同近五十名年輕律師同大狀成立「法政匯思」。至於醫學界，繼醫學會會長史泰祖同前會長蔡堅因為搞佔中立場民調鬧不和後，一班年輕醫生最近亦成立「杏林覺醒」組織，除咗表明唔支持人大「八三一」政改決定外，亦要求政府重啟政改。
杏林覺醒尋日正式面世，除咗約十名核心成員外，亦邀請咗唔少醫學界嘅前輩做嘉賓，包括史泰祖、蔡堅及「怪醫」立法會醫學界議員梁家騮等。杏林覺醒成員話，史泰祖嘅政見同佢哋南轅北轍，又批評醫學會即將進行嘅問卷調查喺設計問題方面好含糊，但史泰祖都好畀面，發言時讚揚一班年輕醫生願意為政改付出同承擔，仲坐到活動完結先走。
話怪醫取態曖昧
另外，雖然佢哋話感激怪醫做咗一份業界回應率好高嘅民調，但就寸怪醫取態一向好容易轉變、曖昧及「精甩鞭」，仲講明呢個組織係壓力團體，要求怪醫一定要否決政改，搞到怪醫都忍唔住講番句「議員唔易做」。