立法會議員不時藉外訪遊埠，好似去年九月先去完芬蘭、丹麥及挪威訪問，嚟緊下月初又免費去德國外訪喇。由於每次外訪名額有限，而且有公帑找數，所以議員經常爭崩頭報名。相反，本地考察就無人問津，好似民政事務委員會原定本月安排本地參觀活動，但就因為報名議員少於三人而被迫取消。
一班議員平日將本地民生議題掛在口邊，但就寧願外訪都唔去本地考察，似乎係想去玩多過為民請命囉！
立法會民政事務委員會原定喺本月十日安排委員參觀香港文化博物館及香港歷史博物館，只要有三位或以上議員報名就成團，可惜最終因為人數不足而要取消。睇番康文署嘅數據，兩間博物館喺一二至至一四年兩個年度嘅入場人次都有下降趨勢，而一班議員又經常批評本地文娛康樂設施使用率低，其實係咪應該把握機會實地考察，睇吓有咩地方需要改善呢？幾個鐘頭時間都攞唔出？
講番德國訪問團，閃電成團，值得注意嘅係，除咗陳克勤外，其餘團友都係泛民主派控制嘅人事編制小組委員會委員，其中會計界梁繼昌更擔任主席。由於行程其中一日撞正周三嘅人事編制小組委員會會議，喺大部分委員都去咗外訪嘅情況下，只好順延至三月十一日先至開會嘞。