政情：泛民賴雙學不合作
泛民主派去年盡地一煲喺議會發起不合作運動，繼冧友突襲工務小組反被建制派全面進擊後，接力再喺財務委員會「拉布」計劃拖冧三堆一爐同創新及科技局，但夾喺中間嘅公務員加薪撥款卻一度塞死，辣慶全港公務員，泛民議員民望更全線插水，七個上榜泛民冇一個評分合格。當日泛民想借不合作運動拖死政府博反彈，豈料偷雞唔成蝕揸米，有泛民中人更賴「雙學」班後生仔唔做嘢。
事實上，泛民好快已經明白難以透過不合作運動延續佢哋口中嘅雨傘運動，亦唔見得對政府施政有太大威脅，因此佢哋早已打定輸數，以創科局「拉布」作為最後一擊，叫做了結咗呢場不合作運動。
打定輸數 盡快收檔
泛民拖得死創科局固然還得神落，即使拖唔死亦要盡快收檔，否則年底區議會以至明年立法會選舉肯定一鑊熟。
不過，有泛民成員私下埋怨，佢哋交足晒功課，賠上民望發起不合作運動，反觀昔日同路人、一眾「雙學」、即學聯同學民思潮領袖不但多謝都冇句，早前言之鑿鑿話搞「傘落社區」運動，落區宣揚民主訊息，可惜班後生仔每次唔係被狙擊，就係被當區居民圍住鬧爆，難怪「傘落社區」搞搞吓都散埋水，無疾而終。
睇落多個「雙學」領袖近日真係潛晒水，繼學聯秘書長周永康計劃海外升學，副秘書長岑敖暉又拍拖大過天，難怪佢哋不但鮮有現身，就連早前揚言會趁政改第二輪諮詢狙擊政改三人組嘅計劃都冇晒影，政府高官無論係高調走勻全香港九龍，抑或低調現身派傳單都唔見雙學「表達意見」。
其實「雙學」喺佔領行動幾乎由頭帶到尾，泛民議員都係抽水居多，與其埋怨「雙學」唔夠畀力，不如諗吓當初點解押錯注要搞不合作運動，令到自己落得如斯田地，分分鐘賠上議席呢？