政情：中環出更：隨時落鑊 貪曾玩cheap郵輪團
律政司刑事檢控專員楊家雄喺上月底證實，廉政公署已完成對「貪曾」前特首曾蔭權爵士貪腐案嘅調查，律政司「very soon（好快）」就會決定係咪檢控佢。原來喺差不多同一時間，貪曾與太太曾鮑笑薇正係坐緊郵輪，而且仲係坐cheap cheap（平價）郵輪團。貪曾隨時面臨檢控，仲有心情遊山玩水？
尷尬黑面 避團友視線
據悉貪曾夫婦上月底參加咗一個六日星馬郵輪團，期間有人見到佢表現尷尬兼心虛，全程黑面，並不時低頭玩手機避開團友視線，好似唔見得光咁。據聞該郵輪團團費只須每人三四千元，以貪曾每月仲攞緊香港納稅人十幾萬元長俸計算，名副其實係cheap到爆，估計佢班富豪「曾朋友」明知貪曾落難在即，早已將佢離棄。貪曾想再坐免費富豪遊艇，可能真係要等下世。
講開貪曾，日前佢現身中聯辦新春酒會時，進場離場都快閃迴避記者提問，喺會場內亦表現鬼祟，大部分時間都匿喺貴賓室唔敢出嚟，咁又係嘅，佢都冇份上台向全體嘉賓祝酒，只能喺台下呆望，認真眼冤。酒會過後，多日來都唔見貪曾再次出巡，尋日只見佢架前特首政府專車，喺傍晚時分進出過佢喺淺水灣嘅寓所，估計係送文件畀佢，估唔到落咗台都繼續浪費公帑。
卓妮