有個笑話係咁嘅，一位露宿者喺公園長椅呼呼大睡，管理員走過嚟拍佢膊頭：「我哋夠鐘關門嘞。」露宿者睡眼惺忪咁回答：「唔該晒，麻煩你關門時輕手啲，唔好嘈醒大家。」
嗱，咪以為只係笑話吖，喺現實世界裏面，香港露宿者問題愈嚟愈嚴重，淪陷嘅何止公園，幾乎有瓦遮頭嘅地方就有佢哋嘅蹤影。難怪有人話，香港係唔係購物天堂唔敢講，露宿者天堂就一定實至名歸！
冇錯嘞，日前北角英皇道發生露宿者以生果刀挾持人質事件，再度引起社會關注露宿者問題。本報記者到多個黑點巡查，發現本港唔少公共設施已經淪為「露宿者之家」。好似旺角一個行人天橋底咁，簡直變成另類「豪宅」，住客梗係寫意啦，唔使交租又風涼水冷，最慘係附近嘅街坊，晚晚經過都提心吊膽，有店舖甚至被迫提早落閘添。又好似深水埗界限街一帶咁，行人路被露宿者霸佔，用木板同舊傢俬搭出一間間臨時「寮屋」，裏面擺滿雜物，衞生惡劣，仲傳出陣陣臭味，搞到居民及商戶飽受困擾。
正如有人話齋，睇一座城市嘅市容，就知道佢嘅興衰。香港周街都係流浪漢，露宿者之家遍布全城，想唔認淪落都唔得喇。係人都知，露宿者隨處紮營，唔止霸佔路面，影響市容，仲造成環境衞生同治安問題。當局身為執法者，角色就好似笑話入面嗰個公園管理員，係咪應該嚴正執法，還香港一個乾淨安全嘅空間呢？
其實，香港之所以淪為露宿者天堂，就係因為港產官僚闊佬懶理。有區議員踢爆，曾經就露宿者問題向社署、地政總署及警方等求助，但如泥牛入海，無晒下文。有立法會議員更直指，露宿者聚集之地烏煙瘴氣，衞生惡劣，早已成為本港恒久問題，但係政府相關部門長期互相推莊，敷衍塞責，關人個關，以致問題不斷惡化。話時話，處理露宿者問題唔係咁難啫，如果當局有心解決，又點會拖到今時今日吖。
講開又講，除咗露宿者問題不斷惡化，假難民問題亦唔好得去邊嘅咋。近年來港提出所謂酷刑聲請嘅非洲裔及南亞裔人士愈來愈多，擺明來港搵着數，點知港府居然大開中門，聽之任之，任由佢哋橫行霸道，將香港搞到烏煙瘴氣。香港周街都係假難民同流浪漢，簡直同第三世界冇乜分別。咁講喇，露宿者問題的確係一個黑色笑話，不過瞓緊覺嘅唔係露宿者，而係港產官僚。