政情：撞正裝修 工記團年飯轉場
工聯會尋晚擺足四十二圍，宴請五百幾個獨居公公婆婆提早食團年飯，更請到特首梁振英（CY）同勞工及福利局局長張建宗（小肥張）陪食。
KK冀港「馴番啲」
不過，今年團年飯突然唔再選址立法會議員陳婉嫻（嫻姐）嘅地頭黃大仙，而轉場九龍灣一個商場，原來往年贊助晚宴嘅叙福樓集團執董黃傑龍（Simon），其黃大仙間酒樓所位處嘅領匯商場進行緊大裝修，而且裝修後仲唔知可否續租。
Simon透露，黃大仙個舖位已經租咗十年，只係做區內街坊生意，賺得唔多，希望領匯手下留情，部分公公婆婆明年就可以原區食團年飯喇。講返餐團年飯，有份陪食嘅黃國健（KK）致辭時語帶雙關話，希望香港踏入羊年都「馴番啲」，獲全場拍掌讚好，唔通佢話緊班「拉布」議員野性難馴？