最低工資委員會（下稱委員會）未來將面臨「面目全非」！政府尋日公布新一屆委員會成員任命，結果全部委員「冧莊」，包括做咗兩屆主席嘅資深大律師翟紹唐（翟少）。
不過，連埋翟少在內，有六個成員已經連續做咗兩屆，做埋嚟緊新一屆後，已到咗擔任公職人員六年任期嘅上限，即係話再下屆肯定超過一半成員要換人，到時兩年一度嘅最低工資水平檢討嗰陣，可能會有更多爭拗或罵戰。
其實委員會一直以來傾最低工資水平時，都有唔少爭拗，尤其是勞資雙方都各持己見，各不相讓。就好似去年咁，大家為咗五毫子而鬧到面紅耳熱，搞到氣氛異常緊張。
好彩最後有壓得住場嘅主席翟少出手，協調勞資雙方，大家最後先至達成共識，同意將最低工資水平由依家三十元，加到三十二個半。
不過，再下一屆翟少唔喺度，又有咁多新委員，磨合需時，加上議題咁敏感，肯定會火花四濺，唔知到時可唔可以準時交到建議報告畀政府喇。