著名小說《圍城》有段經典情節︰主人公放洋歸國，點知連半個學位都撈唔到，無奈之下惟有幫襯「文憑販子」，買番個「克萊登大學」博士學位傍身。估唔到時隔幾十年，假文憑愈演愈烈，仲連累埋香港嘅大學添，問你死未。
係咁嘅，近日內地著名購物網站有人自稱可出售「香港蘇文大學」短期培訓課程，由大學副學士以至碩士學位證書一應俱全，索價一百至一千蚊人仔不等，仲話七日搞掂添。咁都唔止，「大學」網頁登埋佢哋喺中環國金同尖沙咀海港城嘅「校舍」，仲用電腦合成技術喺牆身key上「校徽」，真係唔知畀佢嚇死，知就畀佢笑死。
嗱，校名影射中大都算嘞，騙徒居然離譜到用埋校長沈祖堯同學生嘅合照做招徠。中大見勢色唔對，尋日拿拿臨發表聲明，同呢間「蘇大」劃清界線，仲話保留追究權利；教育局亦講明「蘇大」並唔係註冊或臨時註冊學校咁話。
又唔怪得中大咁勞氣嘅。無喇喇畀人擺上枱已經夠無辜啦，「學位」仲要cheap到一千幾百有交易，直頭有損身價，唔嬲就假咯。再講吖，香港人一睇呢間騎呢「大學」就話知係流啫，好多內地人未嚟過香港，唔熟行情，正如香港人見有啲議員挾外國大學博士銜頭，可能都會肅然起敬，點知其實係野雞大學呢！唔好唔記得，連內地官媒都報道過「蘇大」嘅新聞，有人落疊一啲都唔出奇。
話時話，內地山寨文化博大精深，除咗騙徒唔假，乜嘢都有假，其中假文憑更加係一門大生意。你知啦，內地近年時興「博士書記」、「博士後部長」，有需求自然有市場，其實好多文憑消費者明知係假，不過係周瑜打黃蓋，一個願打一個願捱咁解啫。不過咁，騙徒啲功夫仲差小小，如果起名「香港英文大學」、「香港法文大學」、「香港德文大學」咯喎，迎合國人崇洋媚外嘅心理，話唔定大有作為，家陣偏偏叫乜鬼「蘇文大學」，非常之咁「土八路」，吸引力大極有限喇。
好嘞，講番正經。無論鍾唔鍾意都好，中港融合已經係大勢所趨，有人形容過程就好似打開門窗咁，陽光空氣入得屋，蛇蟲鼠蟻一樣入得屋。大家有眼見，近年涉及內地居民嘅負面新聞同犯罪案件幾乎無日無之，中港矛盾咪就係咁一點一滴積累起嚟囉。今時今日，香港乜都政治化，假大學事件表面係笑話一則，處理唔好一樣可以爆大鑊。
點都好喇，唔該中港當局認真處理好呢單嘢，如果唔係，隨時又畀有心人利用嚟挑起事端，搞到滿城風雨，到時盞大家都冇癮咋。