運輸及房屋局副局長邱誠武日前被隻老鼠玩到佢周身唔自在。事情係咁嘅，邱副局八十多歲嘅母親住喺荃灣福來邨公屋，日前一隻老鼠在大廈的十二樓走廊出現，從氣窗跳入邱老太家中，成晚「吱吱聲」啃番薯。
事件惹起公眾關注。一來邱副局自己住豪宅，又有物業收租，身為高官月入逾二十萬元，何以年邁母親仍獨居公屋「寬敞戶」；當然，邱副局主動澄清其母非獨居，現與另一名兒子生活；之不過，邱母日前受訪時稱子女已婚搬出，自己是獨居。睇怕邱老太被懷疑係公屋「寬敞戶」，邱副局不能一句「說了算」；身為運房局副局長嘅佢，冇理由唔叫阿媽拿拿臨搬出，騰番個公屋單位畀更有需要嘅劏房輪候者。畢竟，「損不足而奉有餘」，非天之道也；為官之道，好學唔學，千祈咪學貪曾之舔到盡。
有論者指邱副局做了七年高官，主管運輸及房屋政策，搞到房屋問題愈演愈烈，港鐵及高鐵醜聞更是不絕於耳，又被指在處理的士司機堵塞機場事件上嚴重失職，可謂無才；身為人子，未盡力照顧母親，可謂無德。現任管治班子充斥無德無才之輩，怎麼可能不亂象叢生？
老朽絕對相信政府現任嘅管治班子，「望之不似人君者」多的是，甚麼「吳得掂」、「劏房波」、「廢柴一鑊」……當你見到坑渠老鼠，自不然就會想起佢哋！老朽倒認為邱副局或許是五四運動大旗手陳獨秀嘅信徒，皆因陳獨秀曾有「萬惡孝為首」之說，其反對封建的三綱五常，在當年具有一定的進步意義。
邱副局為高官而深懂經濟致用，絕非中國舊式之書生，乃二十一世紀有新思維之好官；相信邱老太之「寬敞戶」一經報道，老鼠知道叩錯門，邱老太打開氣窗讓鼠飛就是！而福來邨之街坊，今後鼠患相信可治！邱副局又記一大功焉！