近年賀歲煙花匯演都係由親中社團贊助居多，今年則由理文造紙有限公司贊助，無獨有偶，原來十年前嘅二○○五年賀歲煙花匯演亦係由佢哋贊助，據聞理文造紙唔係因公司成立「逢五逢十」先贊助，而係諗住過咗十年，不如再贊助一次，因此同政府一拍即合。
理文造紙十年前贊助賀歲煙花用咗四百八十萬元，理文造紙首席執行官李文斌（Edmond）話，今年預算贊助要用六百萬至七百萬左右，而因應新一年係羊年，會有好多「羊」字，希望大家都喜氣洋洋。
身為「八十後」嘅Edmond又預告，今次九幕煙花中，其中八幕都會播放佢嘅年代，有關本地歌星為人熟悉歌曲，等大家都有所共鳴，仲可以一齊唱埋一份喎。