政務司司長林鄭月娥、政制及內地事務局正副局長譚志源同劉江華出席八大商會政改論壇，撞正今次台下唔少提問都好奇怪又創新，其中愛港之聲高達斌話，依家學生唔懂禮節，直言香港八間大學校長唔好再同情學生，直情應該鬧醒佢哋先啱；有人則建議政府再次成立臨時立法會，等政改可以順利通過。
球賽比喻 勸泛民諗清楚
面對台下發表意見多過提問嘅情況，譚志源就順水推舟將個波交畀劉江華，而劉亦逐一回答台下提問，最後仲要玩埋比喻，話依家就好似一場球賽，前鋒扭到入小禁區，射得入就全場鼓掌，射唔入就一定被噓，希望泛民諗清楚才於政改投票。劉江華呢個比喻贏得全場掌聲，似乎佢尋日就搵到自己嘅獨特定位。