政情：受惠內地打貪 陳智思食得清淡
內地近年雷厲風行打貪，連行政會議成員陳智思（Bernard）都受惠？話說Bernard早前獲邀出任中國國電集團公司董事，主要睇中佢有香港企業管理經驗。佢自言由於內地打貪，開會後會喺該企業飯堂食工作餐，啱晒佢可以食得清淡嘅口味，好似食過粗糧，而煨番薯亦好好味，加上佢唔熱衷杯中物，日後唔使再諗藉口推卻別人飲酒邀請。
佢續指，內地方面全面檢視國企管理，形容依家國企開會猶如三月北京「兩會」嘅翻版，有好多工作會議及事前調研工作，估計每年要到北京等地多次。
參賽跑步六公里
除此以外，Bernard最近亦獲邀請出任香港超級馬拉松協會榮譽會長，上月底更於科學園舉行首屆超級馬拉松賽事，佢都有落場跑番六公里，又笑言如果再跑長啲路程就唔好，皆因之前曾經整親膝頭喎。