政情：中環出更：楊立門新歌 有感而發
有「政務官歌王」之稱嘅民政事務局前常任秘書長楊立門（Raymond）去年提早退休，當時講過會認真考慮發展歌唱興趣，最近更有新歌面世，一手包辦演唱、作曲同作詞，希望可以重新團結港人，勉勵大家放低成見，再次牽手共同為港人謀福祉。
《再牽的手》親自作曲作詞
卓妮早前喺灣仔見到Raymond，獨自一人到駱克道圖書館上網睇書，事後問番原來「健康快車」三月中搵Raymond幫手舉辦個人演唱會，希望籌款幫助有需要嘅人。佢透露，依家每日健身練歌作最後準備，更為自己首次個人演唱會親自作曲作詞，新歌歌名係《再牽的手》，並會喺演唱會上首次獻唱。
當問及新歌創作嘅背景，Raymond話，去年睇到港人因政治議題立場不同，出現有好朋友割席變為陌路人，家人兩代決裂不瞅不睬等現象，有見呢個社會撕裂情況令人擔憂，因此有感而發下創作新歌，勉勵港人互相尊重同包容。除此以外，Raymond嘅退休生活百足咁多爪，將於十月為香港中樂團籌款演唱，又開始寫緊一本文藝小說，擬加入作家行列，笑言一旦出版面世希望各方多多捧場。
卓妮