每逢周末，維園同埋皇后像廣場例牌被外傭「佔領」，大家早就見怪不怪嘞。不過咁，如果屋企附近嘅行人要道都被「佔領」，仲當正廚房咁明火煮食，咁就唔同講法，事關阻礙交通已經令人冇眼睇喇，萬一發生火警等事故咯喎，分分鐘殃及池魚o架。
咪以為講笑呀，話說馬鞍山公園有一條接駁區內主要屋苑嘅行人天橋，每日出入嘅街坊多不勝數。本來一直風平浪靜嘅，點知近排一到星期日，天橋就變身「外傭廚房」，大批外傭席地而坐不特止，仲帶埋爐具「搵食」。原來佢哋為咗賺外快，竟然諗出明火煮食呢一招，專門向同鄉出售。
嗱，本報記者實地視察，發現外傭出售嘅食物五花八門，有飯盒啦、湯麵啦、煎炸小食啦，仲有支裝飲品添，色香味俱全o架。而佢哋亦非常警覺，每逢有陌生人經過就停止做生意，仲會用雨傘、膠枱布甚至棉被遮掩爐具，好似擺陣咁款，搞到街坊想搵條路行吓都難。其實，冇路行都唔係最大鑊，街坊最擔心嘅係，萬一爐具發生爆炸，引致火警，到時唔止玩火者必自焚，途人亦受波及，搞出人命都有之。
講到呢度，大家一定會問，外傭非法擺賣兼違反逗留條件，唔通政府部門唔執法嘅咩？冇錯嘞，街坊一早投訴到口水乾，之但係當局所謂嘅執法，真係同冇執法冇乜分別。聽吓入境處點講啦，發言人話喎，上月中曾聯同食環署到上址進行反非法勞工行動，拘捕咗一名涉嫌於公眾地方售賣食物而違反逗留條件嘅女傭。大家冇聽錯，上址閒閒哋有幾十人「搵食」，當局只係象徵式拘捕一人咁大把，犯法成本咁低，唔怪得外傭冇有怕喇。
講真吖，除咗入境處執法不力，食環署亦責無旁貸。大家有眼見o架，平時食環署追捕小販非常神勇，尤其係對付七老八十嘅小販長者，執法從不手軟，偏偏對付外傭懶懶閒，如果咁都唔係大細超，講都冇人信喇。立法會議員就講得啱嘞，當局咁做，等於為外傭製造唔執法嘅錯覺，只會令亂象向其他地區蔓延，到時想收科都幾難。嗱，話口未完，沙田街市一帶近日亦告失守，每逢假日，單車停泊處都有大批外傭霸路聚餐，行人路更擺滿大堆貨物，問你怕未。
即係咁，港人對外傭一直好包容，知道佢哋平時工作辛苦，放假需要地方鬆一鬆，就算維園等公眾場所被外傭周期性「佔領」，市民亦盡量包容。之但係，包容唔等如縱容，從事非法行為，點都講唔通。一句到尾，官老爺幾時至肯做嘢吖？