政情：機局新CEO做鍵盤戰士
香港機場管理局近年醜聞多多，前年被外界質疑機場商鋪招標有利益輸送之嫌，近日仲被申訴專員公署痛斥處理投訴嗰陣講大話，令機管局形象插水。話就話連串負面事件都喺前任機管局行政總裁許漢忠在位時發生，事有巧合，機管局新任行政總裁林天福尋日正式加入寫網誌嘅「鍵盤戰士」行列，同市民分享機場嘅日常趣事，似乎想搞好公關宣傳工作。
首篇網誌大打親民牌
機管局新開嘅網誌叫「『飛』常日誌」，林天福於網誌嘅「處女作」題為《機場的「旅」與「情」》，顧名思義係畀員工分享難忘工作經歷，甚至旅遊趣事，希望令大家對香港國際機場有更深認識。
林天福其後又話，加入機管局後外遊或公幹都會加倍留意外地機場，舉例指早前去三藩市度假，發現三藩市機場有航空圖書館同博物館，又喺客運大樓展出藝術作品，至於香港國際機場亦好重視旅客體驗，例如聖誕節會舉行魔術表演、聖誕燈光投影等節目。林天福首篇網誌嘅定位較為軟性，大打親民牌，日後如有需要唔知會否用嚟釐清事實理據，大家要拭目以待嘞！