政情：黃傑龍首爾獲長者教路
首爾出招搶旅客，出動精靈長者迎賓！叙福樓集團執董黃傑龍（Simon）早排去首爾公幹幾日，同飲食集團傾合作大計，期間某日想由明洞搭地鐵去江南區。正當佢猶疑緊點樣搭車時，一位着制服嘅伯伯主動上前打招呼，用簡單英文問佢哋想去邊，然後三扒兩撥幫佢哋買飛，反應相當快。佢細心一睇更發現車站內仲有幾位老人家，原來佢哋係訓練有素嘅服務大使。
地鐵服務大使 倡港效
韓國早前搞過多次國際性活動，包括亞運、世界盃等，據聞精靈長者都有出動迎賓，而且學得一口流利英文及普通話。眼見當地咁識用人，Simon都話好值得香港借鑑，因為唔少香港長者依然好精靈，如果善用佢哋教旅客搭車，順便講吓香港掌故，比起一味派米派錢畀長者，更加有意義喎。