政情：泛民內訌點爭普選？
泛民主派因佔領行動一役，令激進勢力進一步抬頭。其中分屬溫和泛民、人稱「大話湯」嘅公民黨議員湯家驊多次開列政改「袋住先」條件，最新一次訪問更炮轟泛民唔適合從政，亦無乜政治智慧，認為大聲疾呼推翻人大常委會「八三一」決定無意義；資訊科技界議員莫乃光（Charles）同民主黨前副主席狄志遠（Dick）亦疑似發表「袋住先」言論，惟三人嘅言論一出都難逃泛民同道中人開火還擊，顯示泛民內部矛盾無日無之，要團結爭取真普選真係無從說起。
湯轟自己友冇乜政治智慧
泛民內部不時出現「捉鬼」疑雲，只要有人講出有關泛民應該「袋住先」嘅言論，即時會畀其他人攻擊到體無完膚，最新一人係大話湯，佢尋日出席出席電視節目時再三強調，如果中央承諾二○二○年立法會選舉取消功能界別、二○二二年特首普選提名門檻降低至合理水平，佢相信咁代表中央已經釋出誠意，會游說港人「袋住先」。
大話湯又話，否決權係泛民主派唯一嘅政治籌碼，如中央唔容許港人喺一七年有真普選，希望退而求其次改為爭取取消功能界別，否則佢就算離開立法會都「死唔眼閉」。
不過俗語有云，哀莫大於心死，大話湯坦言做咗十一年立法會議員，呢件事令佢見識到泛民唔適合從政之餘，亦冇乜政治智慧，認為佢哋大聲疾呼推翻人大決定完全無意義，只會將自己逼埋牆角，最後只會搞到「無彎轉」。佢又強調政改係嚴肅嘅憲制問題，唔係建制同泛民嘅口舌之爭，希望輿論可逼使泛民返談判桌同中央溝通。
政改決議案未出 已分裂
除此以外，Charles同Dick日前亦發表疑似「袋住先」嘅言論，其中前者話即使依家要「袋住爛橙」，屆時有機會拿「靚橙」回來，但好短時間內就轉口風，重申唔會接受人大決定框架下嘅政改方案；後者則甫開腔亦即時畀人圍插。
民主黨主席劉慧卿出席論壇時話，尊重議員表達嘅自由，但黨內無討論過大話湯嘅建議，亦唔會接受政府假借普選功能界別甩身喎。話時話，政府嘅政改決議案都未出台，泛民內部已經鬧得四分五裂，相信好戲一定會陸續有來。