中環出更：曾單手踩車何君堯自炒
尋日有健康產品品牌於金鐘舉辦慈善單車馬拉松，吸引唔少城中名人參與。卓妮見到屯門區議員何君堯（Junius），原來佢自小開始踩單車，仲曾經為保護心愛嘅攝錄機而炒車，搞到損手爛腳，不過佢無因此對踩單車卻步，依家更轉玩難度更高嘅山地單車添。身為主人家嘅健靈慈善基金創辦人陳曦齡則自言以前較少踩單車，但近日喺大埔工業邨新增咗個廠房，表示日後會不時喺附近踩吓喎。
講起多年來最難忘嘅踩單車經歷，Junius憶述，九六年時任仁愛堂主席時，同一班董事局成員去九寨溝踩單車，當時佢右手揸住一部「八米厘」攝錄機，左手控制單車，但單手踩單車始終冇咁靈活，加上佢只係顧住將部攝錄機攬到實一實，最後部機冇事，自己則因失去平衡受傷。
今次單車馬拉松亦有二人為一組嘅名人邀請賽，灣仔體育總會主席林貝聿嘉都有過嚟觀戰，為仁濟醫院總理湯振玲、灣仔區議員伍婉婷等參加者打氣但一個圈對佢哋似乎唔夠喉。而帝盛酒店太子女邱詠筠則為新增嘅兒童滑步車賽事鳴笛起步，見到一班小朋友玩得咁開心，佢都忍唔住會心一笑。
雙「高」檔出戰慈善賽
至於食物及衞生局局長高永文就夥拍毅歷協會名譽會長高誌樫（Derek）一齊參賽。Derek少年時代因意外截肢，但熱愛單車嘅佢冇放棄，仲將單車改裝到適合自己使用為止。雖然Derek可以踩得好快，但呢日專程遷就自言踩單車好水皮嘅高永文，等埋對方一齊衝線，充分體現運動上嘅合作精神。
卓妮