古人話：「大學之道，在明明德，在親民，在止於至善。」理論上，大學係教育嘅殿堂、人才嘅搖籃，肩負傳道授業解惑嘅神聖職責，不過咯喎，理論歸理論，現實歸現實，香港嘅大學愈來愈政治化，教師良莠不齊，有人不務正業，搞到教育水平每況愈下。
唔係亂噏o架，大學教育資助委員會公布二○一四年研究評審工作報告，揭露八大院校有教學人員濫竽充數，亂交研究項目成果，當中有百分之四嘅研究項目被評為不予評級嘅U級，原因係有人居然將課堂筆記、報章評論當作研究報告提交，有人甚至連報告都唔交，問你服未。
最匪夷所思嘅係，作為百年老店嘅香港大學評級不斷下跌，尤其係享負盛名嘅法律學院仲淪為重災區添。根據評審報告，港大法學院嘅學術研究只得四成六項目獲評為三至四星級，有百分之三更加獲最低嘅「不予評級」，表現遜於中大法律學院，你話係咪醜怪吖。
成績表係學生學業表現嘅量尺，同樣道理，大學教資會報告就係大學教育水平嘅量尺嘞。大家清楚睇到，本港院校管理係幾咁烏煙瘴氣，莫講話教學人員嘅研究成果良莠不齊，連提交報告都敷衍塞責，咁搞法，大學教育質素點會唔節節後退吖？大學國際排名又點會唔跌跌不休吖？不過又難怪嘅，近年高等院校見錢開眼，一心一意「作育英財」，仲邊有大學之道嘅崇高理想吖，再咁落去，何止無品教師被評為不予評級，大學亦隨時被國際社會評為不予評級吖。
最令人莫名其妙嘅係港大，作為本港歷史最悠久嘅學府，聲譽一向不俗，點知近年受政治化歪風入侵，急速淪落。其實，港大法學院早就是非不絕，風雨不斷，被人迎頭趕上根本係意料中事。唔使講其他，就講嗰個佔中搞手吖，身為法律學者，公然鼓吹學生違法，港大法學院有咁嘅所謂教學人員，唔揸兜就奇喇。
最好笑嘅係，港大法學院前院長仲狡辯，話有人想針對佢哋喎，又指香港淪為鬥爭之地，對社會無好處咁話。唉，知道就好喇，校園政治化，教師政客化，將香港變成鬥爭之地嘅始作俑者，咪就係呢班不務正業嘅教師囉。
總而言之，大學本應係社會嘅一片淨土，如果連象牙塔亦變成政治鬥獸場，紛紛擾擾，永無寧日，莫講話大學沉淪，成個香港都無運行嘅咋！