政情：夏千福選擇性「封口」

自上任後一向鍾意在網上大晒食蛋撻、去茶樓做騷嘅美國駐港總領事夏千福，自佔領行動開始後迅速「潛水」，久未現身之餘，即使耐唔耐出席公開活動，都對政改採取封口政策，同以往最鍾意月旦政事嘅作風截然不同。尋晚夏千福現身澳洲駐港總領事館澳洲國慶日酒會，被問到做咩咁耐冇更新社交網站，佢居然話自己其實唔係經常上社交網站喎，仲忽然話「我愛澳洲」，認真摸不着頭腦。正當我哋打算追問美國對香港政改嘅立場，夏千福隨即以要見朋友為由，一個轉身絕塵而去。睇嚟夏千福唔係轉性變「宅男」冇蒲頭，只係選擇性唔想講就唔講啫！