政情：今日你上鏡：立會管事羅秉義榮休

立法會議員平日之所以全日困坐立法會大樓唔使憂兩餐，全靠管事們負責佢哋嘅「起居飲食」，其中最資深、已任職近三十年嘅管事羅秉義（Tony），就趁今日六十二歲生日前夕正式榮休，一眾議員尋日紛紛送上祝福，Tony收禮物收到手軟。睇番歷史，今屆全體七十名議員當中，只有譚耀宗、劉皇發同Tony同年「出道」，其他議員甚至主席曾鈺成都係佢後輩。原本係酒保嘅Tony於八五年獲聘進身立法局，一做就三十年，同唔同議員相處多年，應該收埋好多秘聞，但佢維持一貫低調，絕口不提政治，只係話多年來最難忘係有在任議員離世，例如吳明欽等。佢臨別又鼓勵年輕人積極工作，對自己要有要求。