政情：白逗人工 議員仲想提早鬆?
立法會上周三夜晚因為會議法定人數不足搞到流會，為咗防止流會重演，秘書處就提出將星期三大會提早至晚上八點鐘完會，討論唔晒嘅議程就留待星期四朝早九點再續會。班立法會議員竟然唔止冇對缺席會議、白逗人工自我反省，仲舉腳贊成建議，而內務委員會（內會）明日仲會討論有關建議添！班議員薪酬不斷增加，開會時間就不斷減少。議員成日要求政府就政策開公聽會，唔知佢哋又夠唔夠膽開公聽會，聽下有冇市民要求佢哋回水呢？
話促進工作生活平衡
秘書處尋日正式發出建議文件，內容話按照建議每周大會會由周三上午十一點開到晚上八點暫停，並於星期四早上九點開到晚上十點，兩日合共開會二十二小時。根據今屆立法會紀錄，首兩個會期每次會議平均都係用十七至十九小時，而喺七十次大會中只有十五次係開會超過二十二小時，其中七次都係因為議員就財政預算案「拉布」先搞成咁，力撐其實大部分會議都係星期四就可以完結，毋須星期五再開會處理。
人工與付出不成正比
秘書處又力陳提早完會嘅好處，話新建議可以畀議員喺星期三晚上八點後出席議會外嘅活動，亦可以促進秘書處人員、官員、議員嘅職員及記者喺工作同生活上有健康嘅平衡。真係估唔到秘書處照顧議員之餘，對記者都咁體貼。秘書處仲強調，新建議唔會對其他立法會事務造成不利影響，如果大家都贊成就會喺徵詢政府意見後於三月起實施。
其實早喺立法局年代，議員已經通宵達旦咁開會，直到回歸後嘅立法會都係冇特定散會時間，通頂開會直至所有議程完結係慣常做法，直至○五年四月先至改為如果議程唔能夠當日完成，就喺當日晚上十點暫停、翌日再續會。不過，議員愈來愈早收工，但薪酬就愈來愈高，好似今屆咁，短短兩年幾已經由八萬元加至九萬零七百七十元。
議員薪酬係由廣大納稅人支付，唔知成日都叫政府聽民意嘅議員會唔會都開公聽會，聽下市民對佢哋咁嘅工作態度有咩意見呢？