政情：中環出更：中聯辦請飲 阿基表錯情
中聯辦將會喺下周三舉行新春酒會，但有別於去年請晒所有泛民主派立法會議員，今年暫時只係請咗法律界議員郭榮鏗（Dennis）。正當大家密切留意緊有咩泛民議員獲邀之際，尋日就發生一段小插曲，就係民協馮檢基（阿基）以為自己有份獲邀出席酒會，搞咗一大輪後先發現睇錯請柬，認真（火羅）爆。
話說Dennis向傳媒透露自己收到中聯辦新春酒會請柬後，由於其他泛民議員無對外公布自己有無收到邀請，於是記者逐個泛民問下佢哋有無收到邀請。當大家問到阿基時，佢初時話無收到邀請，但過咗一陣又話職員同佢講有收到，令人以為中聯辦同時請佢同Dennis兩人。
睇錯請柬 唔係會展嗰個
正當大家諗住問下阿基會唔會去時，阿基突然之間帶埋啲職員出來澄清，話只係收到中聯辦九龍工作部邀請出席下月二十七號舉行嘅新春酒會，而唔係下周三喺灣仔會展舉行嘅新春酒會。Dennis話，自己將會喺酒會上向中聯辦代表遞信，以表達反對中央企圖喺香港實施國家安全法嘅憂慮。
卓妮