政情：中環出更：慈善宴激鬥 玄來拍賣陳皮皇

楊國佳（中）投得新會靚陳皮，鄧錦雄（左）及圓玄學院社會服務委員會成員陳承志（右）都戥佢開心。

多位宗教界元老為座上客

當晚圓玄學院主席陳國超、副主席鄧錦雄及湯修齊等董事局成員齊出動，圓玄學院崇奉儒、釋、道三教，所以當晚座上客亦有唔少宗教界元老，包括香港道教聯合會主席梁德華、孔教學院院長湯恩佳及蓬瀛仙館理事長洪少陵等人。早前成功爭取興建香港首座孔廟嘅湯恩佳好開心話，計劃已到最後階段，但包括補地價及建築費等開支預計超過十億元，除咗佢出資兩億元外，其他資金就要諗辦法籌措喇！

信奉道教嘅中西區區議會主席葉永成亦有到場，見佢同圓玄學院社會服務部總監梁永義及身兼晚會聯席主席嘅仁濟醫院總理朱德榮（Gary）好好傾。家族做珠寶及物業收租生意嘅Gary話，近期舖位售價經已開始有下跌趨勢，雖然租金仍企穩，但佔領行動後，企業及資金流向如何仍需密切留意。佢預計地產市道將一路慢慢回落，直至一七年特首選舉之後，事關今屆政府打擊樓價決心不變喎。

葉永成（中）撐場，梁永義（左）及朱德榮（右）忙於迎賓。

梁德華（左起）、湯恩佳、陳國超及洪少陵齊宣揚善業精神。（余素月攝）

卓妮