香港出名係「文化沙漠」，提起香港中樂團，好多人嘅印象可能只係喺地鐵睇過有關表演嘅廣告。不過咁，佢哋多年來醜聞多多，特別係人事紛紛擾擾，「噪音」不絕，大家斷估都聽唔少咯。
呢嗱，話口未完又嚟啦。有立法會議員聯同樂團前團長以及三位資深演奏家，指控樂團行政混亂、濫用公帑同用人唯親等多宗罪，矛頭直指樂團現任藝術總監。好似話藝術總監牽頭研製嘅環保胡琴咁吖，唔單止缺乏伸縮性同彈性，音質刺耳，大大影響演出質素，最離譜嘅係，相對傳統蛇皮胡琴可以用十到二十年，環保胡琴至多只有兩年命仔，頻頻替換之下，大量浪費樹木資源，你話係咪假環保真浪費吖。
咁都唔止，幾位資深樂手仲爆料，話根據民政事務局規定，樂團所有職位必須經過公開招聘，點知有人上任後懷疑照顧自己友，多次繞過公開招聘程序，私下聘任駐團指揮等多個職位。除此之外，仲有人涉嫌篤數，報大演出售票情況等等。照佢哋咁講，樂團管理直頭亂過亂世佳人。
面對咁多指控，相關各方點回應呢？樂團方面就輕描淡寫咁話，呢啲都係舊料，而且佢哋帳目一向公開，希望透過溝通減少誤會喎。民政事務局就話會跟進了解。嗱，空穴來風，未必無因，點講都好，當局一定要徹查事件，唔可以袖手旁觀，更加唔可以當冇事發生，事關中樂團話就話已經公司化營運，但八成經費仍然嚟自公帑，當局監管責無旁貸，而市民話晒都係老闆，更加有權知道啲錢係咪用得其所。
話時話，審計署幾年前已經踢爆過樂團管理嘅糊塗帳，差唔多都係呢幾宗罪，當時有人幫樂團解圍，批評審計署外行人批評內行人，家陣樂團自己人出嚟發炮，有關方面點都要認真處理啦啩！
諗起都幾令人悲哀。當局開口埋口話要推廣文化藝術，結果連一個中樂團都搞唔掂，以致醜聞多多，是非不絕，簡直笑大人個口。淨係一個西九文化區，使咗幾百億公帑，成績就冇嘞，蝦碌嘢就大把，連購買藝術品都被質疑入錯貨，物非所值。鬼咩，港產官僚附庸風雅，葉公好龍，旨意佢哋推廣文化藝術，蚊都瞓蛇都死喇。
講真吖，香港人搵食壓力咁大，除非你係鬍鬚曾嗰種歎咖啡睇法國電影嘅有閒階級，又或者環遊世界聽歌劇嘅貪官，否則都幾難有嗰份閒情逸致。所以話啫，港府官員冇咁大個頭偏要戴咁大頂帽，夾硬要打造乜鬼嘢「亞洲文化之都」，唔撞板多過食飯至奇喇！